2007年12月18日 霧

今日讀到明報一篇報導，引述中文大學「大學報」的一個調查，調查結果顯示有六成中大學生並非每次進行性行為都會戴安全套。報導末段還引述了一位中大副教授的看法，認為中小學現時灌輸「驚嚇性教育」，令青少年對性感到恐懼和憂慮。

坦白講我地呢代年輕人有幾多人的性知識係起中學正規課堂學返來呀！我相信大部分年輕人的性知識都是從報章雜誌的風月版呀，又或者互聯網學返來的，然後再係同輩間口耳相傳。所以個教授講到中學的「驚嚇性教育」咁有影響力係唔 make sense 的。仲有如果讀完「驚嚇性教育」後真係咁恐懼同憂慮就唔會有咁多大學生發生婚前性行為o拉。堂堂一個副教授竟然講出d 咁唔合邏輯的說話，真係俾佢嚇一跳。

其實d 學生點解咁大膽唔戴套，最主要係低估風險。他們以為一次偷雞唔戴套唔會有事，其實正正代表他們忽視懷孕和受性病傳染的風險。所以我地接受的性教育恰恰和該位教授的說法相反，係唔夠驚嚇。如果個女o既係發生性行為前想到會懷孕，會成為未婚媽媽，又或即駛打掉未出世的嬰兒，但嬰兒或許已經成形，從而聯想到被打掉的嬰兒屍骸的恐怖，你估佢仲敢唔敢唔戴套？

仲有就係係中大買套係好唔方便的，成間中大只有火車站的七十一有套賣，本部的小賣店也只提供小食和一些日常用品，買套咁唔方便，d學生自然懶得就懶，在情慾的控制下風險意識早已拋諸腦後了。所以我認為中大學生會應向校方反映學生訴求，讓所有的宿舍和洗手間都設有避孕套售賣機。咁先係治本的方法。